إبراهيم الديب يكتب: عويجة أفندي وطلب الأهلي

– قول لي عملتوا ايه يا عويجة أفندي في طلب الأهلي بتاع المشاركة في دوري الأبطال .
– شكلنا لجنة يا افندم للنظر في الطلب .
– ها وبعدين .
– اللجنة انبثق عنها لجنة لفحص قانونية الطلب .
– والمنبثقة عملت ايه .
– اللجنة المنبثقة شكلت لجنة ثانية لبحث جدية الطلب .
– ها وبعدين .
– اللجنة التانية شكلت لجنة جديدة لبحث أهمية الطلب .
– يعني الطلب خلص .
– لا لسه يا افندم .
– ولسه ليه يا عويجة أفندي .
– ما أنا ما سكتش يا افندم .
– ها عملت إيه .
– أمرت بتشكيل لجنة محايدة عشان نعرف حصل ايه في الطلب.
– ها والمحايدة عملت ايه .
– اللجنة المحايدة شكلت لجنة لفحص الأوراق
– تاني يا عويجة أفندي
– أيوة يا افندم ما احنا لازم نتأكد من صحة الأوراق .
– واتأكدتوا .
– لا لسه يا افندم.
– ليه تاني .
– لجنة فحص الأوراق شكلت لجنة لفحص الورق ورقة ورقة والرد عليها بسرعة .
– ها وحصل إيه
– اللجنة شافت إن الورق من النوع الرخيص يا افندم .
– ونوع الورق ماله ومال كده .
– لا يا افندم حتما الورق يكون من النوع الفاخر .
– وجابوا لكم ورق فاخر .
– لا يا افندم أصروا على نوع الورق اللي جابوه أول مرة .
– ها وبعدين
– أنا ما سكتش يا افندم رحت مشكل لجنة لرفض الورق واللجنة اتمسكت برأيها.
– ها وردوا عليكوا .
– حبوا يتحايلوا على القانون ويجيبوا لنا ورق مستعمل.
– ها وبعدين .
– انا برضه ما سكتش يا افندم .
– عملت إيه يا عويجة أفندي .
– شكلت لجنة لكشف التحايل على القانون .
– واللجنة عملت إيه .
– اللجنة شكلت لجنة لفحص الورق اللي بعتوه مرة تانية .
– لجنة تاني .
– أيوة يا افندم أنا أصريت الفانون ياخد مجراه .
– ها وبعدين يا عويجة أفندي عملت إيه اللجنة التانية.
– اللجنة شافت يا افندم إن الورق مغشوش.
– ها وبعدين
– بعتنا لهم وقلنا لهم الورق بتاعكم مغشوش
– وحصل إيه
– بعتوا لنا ورق تاني.
– وبعدين.
– شكلت لجنة لفحص الورق الجديد
– لجنة تاني يا عويجة افندي .
– يا افندم انا قلت لهم يا اما تطبيق القانون يا اما مش هاتشاركوا في دوري الأبطال .
– وحصل ايه .
– بعتوا لنا ورق جديد يا افندم .
– تاني
– أيوة يا افندم .
– وحصل إيه
– شكلت لجنة لتحديد نوع الورق جديد ولا مغشوش .
– تاني يا عويجة أفندي.
– أيوة عشان كده أنا طالب من سعادتك حوافز إضافية لكل اللجان .
– حوافز عشان إيه يا عويجة أفندي .
– تعبوا معايا يا افندم ولازم اكافئهم .
– كتر خيرك يا عويجة أفندي ومتشكر جدا .
– الشكر لله يا افندم .

 اقرأ أيضا – إبراهيم الديب يكتب لـ « 30 يوم : حميدة ودوري الأبطال