إبراهيم الديب يكتب لـ « 30 يوم : حميدة ودوري الأبطال
قولي لي يا ولا يا حميدة هم أهلاوية الكَفر كلاتو بيقولوا إيه بعد الاتحاد الافريكاني ما قالهم انتوا مالكوش مكان في الهيصة الكبيرة
والله يابا محمد الدنيا هايصة وزايطة في الكفر كلاتو بعد الاتحاد الافريكاني ما شيع مرسال لأبويا محمود الخطيب وقاله أبويا موتسيبي اللي ماسك الكورة بتاع أفريكيا بيقولك انتوا مالكوش مكان ولا يحزنون في الهيصة الكبيرة السنة دي بتاع الكورة الافريكية وعليكم بخير بقى السنة الجاية
وسمعت يا ابا محمد إن كبرات الحكومة زعلانين يا ما من أبويا موتسيبي اللي عشم أبويا الخطيب إنه يكون موجود فى الهيصة الكبيرة مع الزمالك والنادي بناع أسيوط القديم وبعدين فص ملح وداب وما حدش عارف له طريق جرة.
وسمعت كمان يا ابا محمد إن كبرات الحكومة زعلانين ياما من أبويا البيه الكبير هاني أبو ريدة اللي ماسك الكورة في بر مصر كله بعد ما عشمهم هو كمان وبعد كده فص ملح وداب ولا حد عارف له طريق جرة
وسمعت كمان يا ابا محمد إن كبرات الأهلي ناويين ما يسكتوش ويشتكوا الزمالك إنه حاطط تكييفات النادي برة العداد بتاع الكهربا وما بيدفعوش وصل النور بتاع كل شهر وناويين كمان يبلغوا شركة الغاز إن بتوع الزمالك موصلين المواسير بتاع الغاز من تحت الأرض لحد بيوتهم عشان يشغلوا البوتاجازات بتاعتهم ببلاش وكمان ناويين يبلغوا محطة المياه إن بتوع الزمالك عاملين تلاجات سبيل برة النادي من ورا المحطة عشان كل اللي فايت على النادي يشرب مياه ساقعة في عز الحر.
وسمعت كمان يا ابا محمد إن جناب العمدة كلم سعادة البيه مأمور المركز وبارك له على وجود الزمالك في الهيصة الكبيرة بتاع افريكيا وسمعت إن جناب العمدة ناوي يعزم سعادة البيه مأمور المركز في الدوار بتاع جنابه عشان يبارك له وسمعت إن جناب العمدة ناوي يدبح وز وبط وفراخ وحمام ياما عشان سعادة البيه مأمور المركز وسمعت كمان يا ابا محمد إن جناب العمدة ناوي يدبح عجول جاموس ياما وامر أبويا سويلم الغفير الخصوصي بتاع جناب العمدة يلف على الكفر كلاتو ويقولهم إن جناب العمدة حب ياخد بخاطر الأهلاوية بتوع الكفر ويدبح عجول جاموس ويفرقهم على ناس الكفر كلاته بيت بيت وزي بعضه يا أبا محمد خلي الناس تأكل لحمة وتتبسط وكل سنة واحنا طيبين .
اقرأ أيضا –إبراهيم الديب يكتب لـ « 30 يوم : فيريرا لا يصلح
