استقر مجلس إدارة نادى الزمالك، برئاسة حسين لبيب، علي إحالة أمير عزمي مجاهد، المدرب العام السابق بالفريق الأول لكرة القدم بالنادي للتحقيق بدعوى إفشاء أسرار العمل وهو ماعتبره مجلس الإدارة خيانة أمانة وعدم احترام لـ المواثيق والأعراف بين أبناء النادي.
جاء قرار إحالة أمير عزمي للتحقيق بعد تصريحاته النارية ضد النادي واستهداف استقرار الفريق في مرحلة هامة من الموسم- حسبما يرى المجلس الأبيض.
و هناك اتجاه بمنع أمير عزمي من العمل داخل النادي مستقبلا، مع إحالته للتحقيق بصفته عضوا عاملا في النادي وأساء لصورة النادي في الإعلام من خلال تصريحاته التلفزيونية التي افتقدت للاحترافية .
وكشف أمير عزمي المستور داخل مجلس النادي حيث أكد، خلال تصريحاته التليفزيونية، أن الزمالك كان في حاجة للتوقيع مع طارق حامد لاعب الفارس الأبيض السابق وضمك السعودي الحالي، ولكن اللاعب رفض طلب الزمالك.
و قال عزمي: الزمالك كان بحاجة للتعاقد مع طارق حامد، في الميركاتو الشتوي الماضي. تحدثنا معه للعودة لصفوف الزمالك، لكنه رفض حيث يرغب في الاستمرار بالدوري السعودي.
وأكد أمير عزمي أنه مدين بالفضل لجروس في اللي وصلت إليه في التدريب، هو اللي حطني على الطريق.
وأضاف: جروس وهو ماشي اداني حذاء التدريب الخاص به في شنطة، وقالي أنا بعتبرك زي ابني، خد ده عشان أنا ممكن مدربش تاني.
قال عزمي: جروس رفض استمرار زياد كمال مع الزمالك، ومكنش مقتنع بيه، وطلب انضمام يوسف أوباما، لنادي الزمالك من بيراميدز بل وكان مصمما على التعاقد معاه.
و بيراميدز رفض رحيل يوسف أوباما للزمالك في الميركاتو الشتوي الماضي.
و كشف عزمي عن معرفته بخبر إجماع المجلس على رحيل جروس، قبل الإعلان الرسمي، حيث أكد: قبل مباراة فاركو في الدوري المصري ببرج العرب، عرفت إن جروس ماشي خلاص ولو أنا مش حريص على الزمالك كنت قولتله وقتها، لكني استنيت وعرفته، وهو رد فعله كان هادي، وقالي إنه كان عاوز يلاعب الأهلي، علشان كولر كان لاعب في فريقه قبل كده.
وحول وجود خلاف بين شيكابالا وجروس، قال أمير: بعد مباراة إنيمبا، شيكابالا كان متضايق شويه، وقفل باب أوضة اللبس، فأنا خدت جروس وروحنا المؤتمر الصحفي، لكن جروس عرف إنه متضايق، لأنه كان راجل ذكي.
وأضاف: كل اللي أقدر أقوله إني لميت مشكلة كان ممكن تكبر بين جروس وشيكابالا، ولما جروس رجع الأوضة لاحظ إن الدنيا هادية وكله تمام.
وأكمل : تاني يوم جروس قال لشيكابالا انت قائد الفريق، ولو في مشكلة في أوضة اللبس حلها انت.
أكد عزمي خلال ظهوره الفضائي: كل ما أشيع وقيل إن جروس كان بينسي أسماء لاعيبة الزمالك غير صحيح على الإطلاق، والكلام ده اللي كان وراه ناس من جوا النادي للأسف.
وأضاف: في ناس عاملة نفسها بتحب الزمالك، ولكنها في الأساس متزملكة، ومع الوقت الناس دي هاتتكشف ولو أنا عاوز أقول على أسماء الناس دي هاقول، مشيرا في ناس في الجهاز الفني كانت بتشتكي من جروس لدى مجلس الإدارة، بحاجات مكنتش بتحصل أصلا من جروس.
وشدد على أنا صعبان عليا جروس، وجروس لما جه كان عارف بس 5 لاعيبة من القوام الحالي، كان أبرزهم عبدالله السعيد.
وقال مجاهد : اللجان اللي كانت بتكتب كلام وحش على جروس، هي هي نفس اللجان اللي قالت إن جروس منع أحمد سليمان من دخول ملعب النادي.
وزاد: جروس قالي كلمة لو الزمالك مكنش معاه جمهور وضعه كان هايبقى صعب جدا جدا.
وفجر عزمي مفاجأة قائلا: في سمسار واحد بس اللي هيخلي الزمالك في خبر كان وهيضيع الدنيا، تحس إنه ماسك زلة لسان على النادي.
وكشف: أنا محدش من مجلس إدارة نادي الزمالك جابني، أنا جروس اللي طلبني بالاسم وقالي تعالى على الملعب، محدش كلمني من إدارة الزمالك حتى قالي تعالى.
