ريهام سعيد تعتذر لهاني شاكر .. وأيمن قمر يكشف صفعات الغرور لينا
كتب- باسم العاصي
حرص الشاعر والسيناريست أيمن بهجت قمر، على نشر مقطع فيديو اعتذار الإعلامية ريهام سعيد للفنان الراحل هانى شاكر، وعلق عليه مشددا على قيمة العلاقات والتسامح وصفعات الندم لينا بعد فوات الأوان.
وقال ايمن بهجت قمر: الموقف ده فكرنى بموقف لأستاذ ليا وصديق أخجل من ذكر اسمه نظراً لقامته الرفيعة كان فيه بينا زعل كبير وقطيعة وفجأه لقيت موبايلى بيرن بابص لقيته هو بيطلبنى استغربت وقلت بغباء “هو بيطلبنى ليه بعد اللى حصل ! ومارضيتش أرد”.
أضاف: في اليوم التانى ، طلبنى مرة تانية، وسارقانى السكينة قلت والله ما هرد، بعدها بشوية طلبنى لتالت مرة هنا قلت هو فيه إيه كدة متهيألى أرد وفعلا رديت لقيت هذا الرجل العظيم صوته رايح وبيقوللى كدة ماتسألش عليا وأنا فى المستشفى وحقيقى ما كنتش أعرف واتعاتبنا وقلت له كل اللى فى قلبى وبعدها بأسابيع قليلة توفاه الله حمدت ربنا إن هو كان أكثر حكمة منى ولم الموضوع عشان مش هاين عليه يمشى واحنا عاملين كدة بعد كل المحبة دي».
جاء تعليق الشاعر أيمن بهجت قمر بعدما فتحت الإعلامية ريهام سعيد خلافها مع الفنان الراحل هانى شاكر، بسبب بموقفها من أغانى المهرجانات.
وقالت ريهام سعيد فى برنامجها: أعرف الفنان هاني شاكر قبل ما أكون مذيعة، وبعد مابقيت مذيعة غلطت غلطة، وبعدها مبقيتش أشوفه فى الأماكن ونفسى أسلم عليه بس كنت محرجة، فى وقت من الأوقات كان بيهاجم موضوع المهرجانات بشكل رهيب، وأنا وقتها بالنسبة لى مطربين المهرجانات ناس طالعة عايزة تعمل حاجة وتفرح الناس، دى كانت وجهة نظرى، وطلعت غلط وهو طلع صح جدًا.
وقالت ريهام : من ساعة ما سمعت الخبر وأنا بقول أنا آسفة بس متأخرة جدًا، موضحة أنها أضاعت أكثر من فرصة للاعتذار له منها: (أبويا كان تعبان فى المستشفى من حوالى شهر، وكان فى نفس المستشفى الدكتور اللى عامل العملية لهانى شاكر، والممرضة قالتلى هانى شاكر تحت، كان ممكن أنزل بس اتكسفت برضو لأنه ممكن يكون زعلان مني.. وندمانة جدًا إنى مخدتش كل الفرص دى، وبقوله أنا آسفة إنى هاجمتك.. إنت أكبر من الهجوم).
موضوعات متعلقة
مروان خوري: هاني شاكر آخر رموز زمن الإبداع والفن الجميل
