تراشق الثنائي أحمد حسن نجم منتخب مصر السابق والإعلامي أحمد شوبير، في أزمة الرد بسبب تعليق من جانب الأخير على كلام الأول.
انتم مسؤولين.. انتم بتهزروا .. !
حيث قال شوبير في تصريحات تليفزيونية على فيديو متداول لـ أحمد حسن وعصام الحضري: مفيش داعي حد يطلع يقول كلمة ويغلس فيها على حسام حسن.
وأكمل: هخدها يا سيدي إنك بتهزر ولكن مش وقته خليها يعم لما الأسبوعين بتوع التوقف الدولي يخلص، إنما مش علشان كان نفسك تكون معاه في الجهاز الفني أو تكون مدير عليه في المنتخب ومحصلش فـ تعملوا كدا، هل ده مقبول ومعقول اللي بيحصل.
واختتم شوبير: يا أخي خلينا نركز.. انتوا مسؤولين انتوا بتهزروا؟ الحاجات الصغيرة دي مش عاوزينها وحبوا بعض شوية.
عارفين دفعاك سببه إيه
وجاء رد أحمد حسن على شوبير قويًا،من خلال حسابه الرسمي على فيسبوك قائلا:
الكابتن شوبير طالع يدينا نصيحة على الهواء وردي هيكون هنا على الهواء، لو حابب تتطوع بنصيحة فأكيد رقم تليفوني معاك وكمان أرقام السادة المحترمين في اتحاد الكرة المصري، ولو كانت النصيحة صادقة ولوجه الله أكيد نتقبلها ونشكرك كمان.
لكن طالما الكلام على الهواء فالرد هيكون على شوبير هنا على الهواء.
وزاد أحمد حسن: لمعلوماتك أنا أعمل مديرا لمنتخب مصر المشارك في البطولة العربية (بتكليف ومتطوعا دون أجر) في محاولة لرد جزء للمكان الذي صنع اسمي وتاريخي كلاعب أنهى مسيرته بلقب عميد لاعبي العالم.
لم نراك ناصحا إلاّ الآن
أما بالنسبة لقصة هزاري أنا وعصام الحضري في القصة دي فهو أمر معتاد من سنين والجميع يراه ويشاهده ،ولم نراك يا كابتن يا كبير يوما تنصح أو تعترض ولكن طبعًا كلنا فاهمين دفعاك بقوة واستماتة واعتراضك ليه.
وأضاف: كابتن اهدى شوية ونصيحتي ليك ركز في شغلك أنت بس وفر نصايحك لحاجة تانية علشان الموضوع مش مستحمل فتن وخناقات جديدة وكفاية اللي بنشوفه وبيحصل كل يوم وأنت سيد العارفين.
