طلعت الطرابيشي يكتب لـ «30 يوم» : ماراثون الأمتار الأخيرة للرئيس السادس للوفد
حزب الوفد من اليومين دول خلاص إنسى الحاله ( ض ) , واللى فات مات مع إنتخابات رئاسة الحزب . اللى خلاص على الأبواب , وبوادر الإنتفاضه الوفديه , والتغييرات المناخية المعاكسة .
وعلى عكس كل الإنتخابات اللى فاتت . إنتخابات المره دى هاتكون على معاد مع صيف ساخن قبل ميعاده نهاية شهر يناير الحالى . وطبعا المفروض تفرز الإنتخابات دى الرئيس رقم 6 فى ترتيب رؤساء الوفد , بعد الباشا فؤاد سراج الدين . وكالعاده فى مارثون الأمتار الأخيره يواصل المرشحين المحتملين , عملية الإحماء والتسخين , للمنافسه على ثقة الجمعيه العموميه .
وتميل أكتر تخمينات وترشيحات الناخبيين , لناحية إتنين من التمن مرشحين . واللى هايكون واحد منهم صاحب القسمه والنصيب .
ومن غير مانضرب الودع , ونقول ونشاور الإتنين اللى عليهم العين معروفين بالإسم , وتيارهم هو الغالب بين كل الوفديين . بس المهم يكونوا على قد المسئوليه .
لأن الشيله تقيله . يعنى مش سهله , مجرد حاجه للوجاهه , أو العياقه , أوشغل بروباجنده لتظبيط التظابيط . لأ دى محتاجه تعب وشغل فحت وردم وبنا من جديد .
على الأقل علشان الصوره ترجع زى ما كانت أيام الباشا . أيام ما كان الحزب ” إسم الله عليه ” حاجه فخفخينه .. ياما هنا وياما هناك .. إ سم وصيت قيمه وسيما . وقت ما كان اللى يطلب الرضى يرضى , والجريده شرحه .
وعلشان ما الوفد يرجع تانى ينور , ويعود لمكانه اللى يليق له , لزما وحتما الإختيار المره دى يكون صح الصح . بلاش شغل الصحوبيه والمجاملات الكدابه . لحسن الحزب مش ناقص اللى هو فيه .
كفايه ضياع وغياب سنين خلته فى ديل السبنسه .. بعيد ومتأخر قوى عن كل الأحزاب اللى لسه طالعه فى المقدر جديد . وده تمن اللى يرضى بالشغل الصغير .
مين يقول الوفد الحزب التارخى اللى كان وكان له شنه ورنه , وفى البرلمان عدده كبير . كتله تقيله يتعمل لها ألف حساب وحساب . النهارده نوابه ” عد غنماتك ياجحا ” مش محصلين 16 عضو . ده كل عددهم أول عن أخر فى المجلسين الإتنين النواب , والشيوخ . يعنى فى النازل .
الترتيب الأخير بعد حزب مستقبل وطن , وحماة وطن , والجبهه الوطنيه , والشعب الجمهورى , والمصرى الديمقراطى , والعدل . أحزاب ولاد إمبارح , اللى لسه متأسسه بعد ثورة 25 يناير
اقرأ أيضا
طلعت الطرابيشي يكتب لـ «30 يوم» :القمح المحصول الرئيسى لثلث سكان العالم « فيه سم قاتل » !
